ئەمڕۆ ئەم کتێبە سەنگینەم لەلایەن هاوڕێم ئالان پەڕییەوە بە پۆست پێ گەیشت کە لەسەر یەکێک لە بیرمەندە پەسەندکراوەکانی منە، بیرمەندێک سپێدەی خۆری تاکگەری لە دڵی ئەوەوە هەڵهات بۆ هەموومان. من نزیکەی 35 ساڵێک دەبێت کیرکیگورد دەناسم، هەروەها ئالان پەریش کوڕی هەمان گەڕەکین… تاقانەترین کتێبی کیرکیگورد بەزمانی عەرەبی (خوف و رعدة) واتە ترس و لەرز، پێموایە لە سلێمانیدا بەس من هەمبوو، لەڕێی منیشەوە دەستاودەستی دەکرد.

ئەم کتێبەی کاک ئالان کە خۆی شارەزای زمانی دانیمارکی یە و کیەکەگورد بە ئۆریگینال دەخوێنێتەوە، دەروازەیەکی گرنگە بۆ ناسینی ئەم بیرمەندە تاقانەیەی سەدەی نۆزدەهەم، ئەگەرچی لەپاڵ کیەکەگورد فەیلەسوفی ئەڵمانی ماکس شتێرنەر بە دامەزرێنەری ئیندیڤیدوالیزم دادەنرێت، بەڵام هێشتا جیاوازن و دوو ئیندیڤیدوالیزمی جیاوازیان بەرپاکردووە. شتێرنەر پتر بەلای ئیگۆیزمێکدا دەشکێتەوە کە خۆی لە خوا و لە دەوڵەت و لە کۆمەڵ دابڕاندووە. واتە من و بەس. من بەبێ هیچ خڵتەیەک. بەڵام تاکایەتی کیەکەگورد بەڕێگەیەکی تردا دەڕوات و هیچ جۆرە منپەرستییەکی تێدا نییە و هەموو ئەو بابەتانەی دەرەوەی بە بابەتی کاریگەر دەبینێت بەبێ ئەوەی من منایەتی خۆی ون بکات. هەموو ترس و هەموو نیگەرانییەک بڕیار و هەڵبژاردنێکی بوونگەرانەی تاکە. گرنگی ئەم کتێبە لەوەدایە بەبێ کیەکەگورد ئێمە ناتوانین نەک لە وجودیەتی سەدەی بیستەم، بەڵکو لە هەموو ئیندیڤیدوالیزمێک و لە هەموو لیبرالیزمێکیش تێ بگەین. وێڕای دەستخۆشی زۆرم بۆ هاوڕێی خۆشەویست کاک ئالان، پێشنیاری ئەوەی بۆ دەکەم هەوڵی وەرگێڕانی کارەکانی کیەکەگوردیش بدات، بەتایبەتی ئەم کتێبە گرنگەی ( یاخود، یان..).