ڕۆژێكی خۆش
ئیبراهیم ناودەشتی
ڕۆژە خۆشەكان هۆكاریان زۆرە، هەرچەندە ڕەنگە یەكێك لەو ڕۆژە خۆشانە، لە ڕێگەی خوێندنەوەی خەم و ئازارو ڕۆژە ناخۆشەكانی كەسانی دیكەشەوە بێت، بێگومان مەبەستمان، جوانی و ئەفسوونی نووسینەوەی ئەو ڕۆژە ناخۆشانەیە، كە بە قودرەتی قادر دەیانكات بە خۆش!
لەم دوو كۆمەڵە شیعرەی كازم خەنجەرو دیار سۆفی، هەست دەكەیت دڵی شیعر لە جەستەی دوو گەنج لێدەدا!
دەزانم لاوانی دیكەش هەن كە بڕوای بە هەقیان نەهێناوە بە ئەفسانەی كۆتایی مێژووی شیعر، لێ ناوهێنانی تەنها دووان، خودییەو پەیوەندیی بە ڕێكەوتی خوێندنەوەی كتێبی ئەو دوو شاعیرەوە هەیە لە ماوەی تەنها یەك ڕۆژدا، كە هەڵبەت ڕۆژێكی خۆش و بایەخدارە، لانی كەم لە ژیانی تاقە خوێنەرێكدا!
كاتێك ئەم دوو دێڕەم نووسی، بیرم كەوتەوە كە (وابزانم) بەختیار عەلی-ە، لە قەسیدەیەكیدا دەڵێ: ڕۆژە خۆشەكان بەسەرچوون!
