نارین، لەو دەنگە تایبەتانەیە لای من، کە دەیخوێنمەوە و چاوەڕوانییم لێی هەیە. تایبەتمەندیی لەودا ئەوەیە لە دەرەوەی پۆل و ڕیز و ڕەگەز و نەوە و جێگە و ڕێگە و پێگەدایە، تێکەڵەیەکە لە ڕەنگی تێکئاڵاو وپێکداپژاو، جوانترین شتێک لە شیعرەکانیدا، کە لە وەسف و درێژدادڕی بێپاساو و وشەڕیزەکیی دووری خستووەتەوە، ئەو نەغمە غەمگینە سوریالییەیە کە وا دەکا بەردەوام دەستت لەسەر دڵت بێ و هەست بکەی شتێک ڕوو دەدا، فەزایەک پڕ لە دەنگ و ڕەنگ و تەڵەزم و پرژەی هەمەجۆر لە وردە چیڕۆک و بەسەرهات.

نارین وەک خۆی لە دیدارەکەیدا دەڵێ، شاعیرییش هەر ئەو منداڵەی جارانی خۆیەتی کە بە کوپێکی پەمەیی پڕ لە شیرەوە، لە باخچەی منداڵانەوە بۆ ماڵەوە و بۆ لای برا بچووکەکەی دەگەڕێتەوە تا بیداتێ و بیخواتەوە، جا ئەگەر تا ماڵەوە قومێکی بچووکیش لە بنی کوپەکەدا مابێتەوە، هەر سوپاسگوزار و قاییلە.