ئەم کۆمەڵە شیعرەی لەم کتێبەدا بڵاوبۆتەوە زۆر تایبەت و جوان بوون چ لەڕووی فۆڕمەوە و چ لە ڕووی زمانەوە… نەوڕەس لە ڕێگەی ئەو زمانە تایبەتەوە فۆڕمی بە خەمی ژنان بەخشیووە و ھەڵیکێشاون لە شعرییەت، هێندە ژنانەیە لە هەندێک جێگەدا گوێت لە قیژە دەبێت و لە هەندێک شوێندا بۆنی دڵشکان دەکەیت، ئیدی زمانی نەوڕەس وەکو مەحشەری وشەیە لە دۆخێکی ھەناسەبڕدا. لێرەدا شاعیر بەتەواوەتی بۆتە وتەبێژی ژنان بەزمانێکی ئەدەبی باڵا… غەدرێکی گەورەیە کە ژن بیت و بەردەوام ئەم شیعرانە نەخوێنیتەوە، لەم شیعرانەوە ئاشنا دەبیت بەدەیان پرسی خەفەکراو. ئەوە سەرەڕای ئەوەی کە بەر دەیان وێنە ئیستاتیکی و تابلۆ تێکشکاو دەکەویت. چەند نموونەیەکی بچووک هەڵدەبژێم لە خوارەوە دایدەنێم.

پێم گووت وەکو من کچیت، بەڵام گەورەیی لە دڵتا بچووکە،

ئەگەر بۆتۆکس و سلیکۆنیش بخۆیت. ل ١٠

بێ ئەوەی گریانم ببینێ، دڵم لەگەڵ قاپەکاندا شووشت

دایکم دەزانێت چۆن برین ساڕێژ دەبێت.

ناکرێ بیرم نەکەوێتەوە گووتی:

لە ژوورێکدا لە دایک بوویت، بۆنی خوێنی سارد و برسییەتی لێدەهات.

ژیان لە چاومدا مەرگ بوو، کاتێک لە شاراندا ئاسوودەیی ون ببووم. ل ١٨

کتێب قەرەباڵغی لێ بردم، ئەو نهێنییە بڵاودەکەمەوە

قاوەیەک خواردمییەوە، ئەو ڕستەیە لێرەدا دەنێژم. ل ٣٢