پیرۆزە نارین
بەڵێن ساڵح
گرنگە پێشانگاکانی کتێبمان هەبن، بەڵام لەوە گرنگتر ئەوەیە چەندێک بە دەنگی نوێ و یاخی ئاشنا دەبین. هەمیشە ئەو شیعرانە لە یادەوەری مرۆڤدا دەمێننەوە کە ڕاستگۆیانە و ڕاشکاوانە لەگەڵ خوێنەری خۆیاندا دەدوێن و دەبنە مایەی لێوردبوونەوەیەکی قوڵ.
نارین، لە کۆمەڵە شیعری “بەرەواژ”دا دەمانخاتە بەردەم خوێندنەوەیەکی جیاوازەوە لە دنیای شیعردا.
نارین، لە شیعرەکانیدا پێناسە باوەکان تێدەپەڕێنێت و ناسنامەیەکی لێوان لێو لە ئیستاتیکا و زمان و ڕۆشنبیری بۆ خۆی دروستدەکات.
بەختی خۆم دەفرۆشمەوە بە شارەوانی،
تا جادەکانی پێ قیرتاو بکەن!
یان دەنوسێت؛
وەک پارەی کۆنی لێھاتوە ژیانم،
لە ھیچ بانکێکدا ورد ناکرێتەوە!
نارین ، یەکێکە لەو نوسەرە ڕژدانەی دەخوازێت وێنە شیعرییەکانی بکاتە بابەتێکی نەرمی ئاخاوتن لە نێوان خۆی و ئێمەدا، بە زمانێک کە چۆڕ چۆڕ شیلەی شیعری لێدەتکێت.
